mardi 26 février 2008

في هاكة اللوبانة نلوكو


العلمانية مقلّقة برشة عباد هالليمات . تحكيلهم على فصل الدين عن الدولة يقلك فلسطين . تقلو الدين حاجة خاصة موش من حق الدولة التدخل فيها ، يقلك غزو العراق وقتل وتشريد الأطفال في أفغانستان .

آنا نحب نفهم شنوة العلاقة بين المواضيع هاذي الكل . الحكاية وما فيها اللي برشة ناس يسخايلو اللي فمة قضايا مصيرية ما عندنا الحق نحكيو كان فيها هي . كيفاش تحكي عالعلمانية والعراق مازال تحت الإحتلال ؟ كيفاش تحكي ع التسامح والتعايش وحوار الحضارات إذا كانت غزة تحت الحصار ؟ لا يا سيدي ، ما نحتفلوش بعيد الحب ما دام مازال عندنا اخوة مضطهدين .

المنطق هذا ينجم يوصل لأفكار خطيرة من قبيل : ما دام ما زال الشعب جيعان ما عندناش الحق نحكيو عالديمقراطية...

كل حاجة في بلاصتها . الديمقراطية ، العلمانية والحريات الفردية مواضيع حساسة ياسر وذات أولوية كبيرة ويلزمنا نحكيو فيها . موش معناها اللي ما عادش بش نحكيو على العراق ، وإلا موش معناها اللي فرطنا في فلسطين عخاطرنا نحكيو ع فصل الدين عن الدولة . وموش عخاطر بوش والا ساركوزي نطق كلمة العلمانية باش تولي في ليلة وضحاها حرام ورجس من عمل الشيطان .

العلمانية ماهياش مطلب أمريكي والا صهيوني . العلمانية مطلب وطني قبل كل شي . باهي ، ماهو قلتو ما يجيش منو ننقلو كل شي مالغرب ببهامة ويلزمنا نخممو في اللي يصلح بينا واللي ما يصلحش ، داكوردو ، هات نحكيو ! شنوة باهي في العلمانية وشنوة اللي ماهواش باهي ؟ علاش في عوض الحوار البناء نركحو نسبو في بعضنا يا عميل يا خاين يا صهيوني ؟؟ مع العلم اللي فمة آلاف الحاجات اللي خذيناها عالغرب من غير ما نخممو فيها تصلح بينا والا لا ، جينا في العلمانية ووقفنا ، علاش عخاطر فمة شكون قال اللي العلمانية هي جزء من مؤامرة ضد الإسلام . آما البروسيسورات بنتيوم المصنوعين في قلب اسرائيل والقمح اللي نجيبو فيه من أمريكا والدوايات المصنوعين فالدانمارك... نرمال نستوردوهم ما فمة حتى مشكل !

أحنا عاجبنا موقع الضحية وما نحبوش نخرج منو ، عخاطر الضحية ديما عندها الحق وديما مظلومة وإذا كان أمورها ماهاش ماشية ، راهي ماهياش هي المسؤولة بل اللخرين . صحيح شعوبنا ضحية متع الإستعمار ومتع الظلم وضحية الإستبداد متاع الحكام لكنها قبل كل شي ضحية متع جهلها وعدم قدرتها على مسك مصيرها بيديها وضحية تقوقعها ورا نظرية المؤامرة وهام يكرهونا ويهود كلاب وصليبيين أحفاد القردة والخنازير... ياخي بالله أمريكا باش تجي تبشبش بيك فين نحطك يا طبق الورد ؟؟ تي ماو حوت ياكل حوت وهذاكا حال الدنيا من عهد الرومان وقرطاج للإمبراطوريات الإسلامية ومن بعدها الإستعمار الغربي . بربي حتى لوقتاش باش نقعدو نخزرو للعالم بمنطق دار الإسلام ودار الكفر ؟ وحتى لوقتاش أي مسألة اجتماعية والا سياسية والا اقتصادية ما نجموا نفهموها كان ما ندخلو الدين في المعمعة ؟

فمة ناس تحبنا ما نحكيوش في العلمانية مادام فمة ظلم واستعمار وعنصرية وهضم لحقوق الإنسان . وفمة ناس ماشي في بالها اللي الأمريكان الكل يكرهونا وغايرين منا (ما نعرش على شنوة) . وفمة ناس حاطة خط أحمر على ليستة متاع مواضيع مكتوب عليها من فوق : "اللي يحكي ع المواضيع هاذم بيوع وخاين وكافر وناكر الملة"... باش ما نستعملش كلام آخر .

lundi 25 février 2008

الفلسفة ومعركة العقلانية



كيف عديت الباك كانت وحدة مالماتيارات اللي نعمل عليهم بون كيف هي الفلسفة . كنت كي ندخل للدرس نشيخ في مخي ، نحس روحي اللي كنت بهيم قبل ما ندخل للقاعة ، واللي الأستاذ قاعد يحللي في عينيا على حاجات عمري ما كنت نخمم فيهم ولا عمرهم كانوا يخطروا في بالي .

أستاذي متع الفلسفة في الباك إنسان متميز برشة . رغم صغر سنو فإنو كان موسوعة متع معرفة . ما فماش سؤال ما يجاوبش عليه ، ومافماش حاجة ما يعرفهاش . إنسان رايع ، بيداغوجيا وأخلاقيا وعلميا . وطوال العام الدراسي عمرو ما أفصح عن معتقداتو هو رغم اللي أحنا ديما شاددينو بالأسئلة : ملحد والا متدين ؟ ربي موجود والا لا ؟ زعمة ماركس كان غالط على طول الخط ؟ وشكون قال اللي تحكيلنا فيه صحيح ؟ انتي مؤمن باللي تحكي فيه والا لا ؟

بالطبيعة فمة برشة كانوا ماخذين الفلسفة على أساس ماتيار صعيبة ومتع تكسير راس وزايد تخدمها . دي توت فاسون تخدم والا تزمر ديما النوت خايبة . والنوت في السيستام التعليمي متاعنا حاجة هامة ياسر ، أهم مالمعرفة في حد ذاتها . لكن كان فمة شكون يتبع ويحب يفهم ، والناس هاذم كانت تقلقهم دروس الفلسفة بدرجة كبيرة على خاطر ما بين اللي تعلموه في التربية الإسلامية وفالدار وما بين اللي يخرف فيه استاذ الفلسفة... فمة فرق كبير وشاسع .

الحاصيلو الفلسفة حلت أمخاخ برشة عباد ، وبرشة نعرفهم في الوقت هذاكة خلاو معتقداتهم الدينية وولاو ملحدين والا لاأدريين... الفلسفة خلاتنا نفكروا ونخدموا أمخاخنا ونتسائلوا ونحكيو في مواضيع ممنوعة... عخاطر الفلسفة كي تجي تشوف ماهياش علم اللادني... وأي واحد عندو الحق يفكر ويتسائل ويحل آفاقو شوية ويعمل نظرة بانوراميك على الدنيا : معنى الوجود ، الإله ، النفس ، الخلود ، اللاوعي ، الحرية ، الموت ، الجنس ، المعرفة ، الأخلاق ، الإنسان... والحاجة الأهم وقتللي نتناولو المسائل هذي هو عدم التقيد بحدود معينة "لا تقف حائلا بين فكرتك ونقيضها" يقول نيتشه . وآنا شخصيا كيف كنت نحرر مواضيع في الفلسفة كنت نلوج على الأفكار اللي "مع" والأفكار اللي "ضد" وكنت كل مرة مبهور بأنو تقريبا كل فكرة عندها نقيضها اللي يمكن يكون صحيح بنفس القدر اللي الفكرة لولى صحيحة... وهو ما يعبر عنو عند هيغل بالجدلية ، يعني الشي ونقيضو الزوز صحاح... في حدود معينة .

الفلسفة هي حجر الزاوية متع الثقافة والفكر . وهي ركن أساسي في تكوين الفرد وصقل قدراتو النقدية . وهذاك اللي خلا منها مادة اجبارية في التعليم التونسي مهما كان إختصاص الباكالوريا . والفلسفة ما تطلبش امكانيات كبيرة : لا مخابر ولا آلات حاسبة ولا تجهيزات ولا حتى شي . العقل والفضول المعرفي هوما اللي واحد يحتاجهم باش ينجم "يتفلسف" ، لا أكثر ولا أقل . آما خسارة برشة ناس ماخذة الفلسفة على أنها حاجة خايبة ، ما توصل لشي ، تكسير راس ، ما منها فايدة... خلي عاد اللي يقلك اللي هي تبعدك عللي قال ربي والنبي...

الحديث هذا على الفلسفة جا في بالي وآنا نقرا في أحد التعاليق على موضوع سابق : "اساتذة الفلسفة اليوم اللي من المفروض هوما اللي يعلموا الناس العقلانية بداو هوما راكبين الموجة ". والموجة اللي يحكي عليها خونا أبوناظم هي موجة التدين اللي توصل في بعض مظاهرها للتخونج ، أي النضال السياسي ضمن خط إسلاموي يهدف إلى أسلمة المجتمع ومن ثمة أسلمة الدولة . علاش وصلنا لها الدرجة ؟ علاش الناس اللي مالمفروض عندهم مسافة نقدية بالنسبة للواقع هوما أول من يشارك في اسكات العقل ؟

نحب نوضح حاجة لهنا : بالنسبة ليا العقلانية ماهياش بالضرورة الإلحاد . والتفلسف والنقد ماهمش بالضرورة رفض ما جا بيه الدين جملة وتفصيلا . من الممكن أنو الناس تكون عقلانية وفي نفس الوقت تكون متدينة ، ما فمة حت شي يمنع ذلك . سبينوزا كان عندو تصورو الخاص على الإلاه ، و كيركيغارد مثلا كان مؤمن ، وكارل ياسبرز وغيرهم برشة... وهاذم الكل فلاسفة كبار . آما فمة حاجات ما يمشيوش مع العقلانية : الفكر الغيبي والتطير وتسليم العقل إلى الشيوخ وغيرها مالمظاهر اللي تبكّي في تونسنا اليوم .

الشي اللي قاعدين نعيشو فيه اليوم في تونس (وأحنا اللي "فصعنا مالبلاد" كيما يقول أبو ناظم نعايشو فيه من بعيد) ما هواش رجوع للربي والطريق المستقيم ، بل هو باختصار شديد الغاء للعقل من الحياة العامة والخاصة واستقالة جماعية من مسؤولية التفكير واعمال العقل . التونسي عايش حالة انفصام في الشخصية من هاك العام : اللي يسمعو في التلفزة ما هواش اللي يعيشو هو في الواقع ، اللي يقراه في الجرايد ما عندو حتى علاقة باللي يرا فيه كل يوم . الناس الكل تحب تنطق وتقول شنوة اللي موش عاجبها في السياسة ، آما كي يصح الصحيح الناس الكل تجبد البندير . وهذاكة علاش برشة لقاو اللي التدين شكل من أشكال المقاومة الصامتة . "الحاكم ما يحبنيش نصلي ، مالا نصلي بالسيف عليه". وهكاكة المظاهر متع التدين تولي شكل من أشكال ممارسة "الحرية" ، أي حرية الخضوع لسلطة أخرى غير سلطة الحاكم : سلطة النص المقدس وسلطة الشيخ الفلاني والشيخ العلاني ، وبالطريقة هاذي تولي شعارات عبثية من نوع "الحجاب يحرر المرأة" شعارات عندها ما يبررها .

العقلانية اللي حاجتنا بيها اليوم في تونس ماهياش عقلانية متاع ماط : الحقيقة واحدة ووحيدة ويلزم الوصول إليها مهما كانت السبل ، بل عقلانية متاع فلسفة : الحقيقة متعددة ونسبية ومتجزأة ، وفي نهاية المطاف كل واحد عندو الحقيقة متاعو . لخلق جيل عندو حس نقدي يلزم الإهتمام بتدريس الفلسفة ووضعها في ضمن أولويات السياسة التربوية . وإذا كان أساتذة الفلسفة هوما أول من يخضع للمنظومة الأخلاقية والقيمية للمجتمع ، فتدريس الفلسفة يبقى كي بيه كي بلاش . عخاطر واحد من أهداف فعل التفلسف هو تكوين فرد قادر على ابتكار قيم جديدة (وهذي فكرة قوية من أفكار نيتشه) ، أما إذا كان الهدف هو تبرير القيم السائدة ، أو تقويتها ، فحقيقة يا خيبة المسعى .

حكايات فارغة

6 حكايات فارغة

طق طق ربي يجيب الحق ! ظاهرلي ظاهرة الطقّان لاقية رواج كبير هالليمات... وبما أنو المرماجي طقّني (بثلاتة نقاط على القاف) فإني نمتثل لقواعد اللعبة :

1ـ حط الرابط متع المدون اللي طقك
2ـ حط قواعد اللعبة في مدونتك
3ـ احكي على ستة حاجات مالهاش معنى وتخصك انتي
4ـ طق ستة مالناس

باهي يا سيدي ، ستة حكايات فارغة :

1ـ نكره الحلوى وكل أنواع معجون الغلة والعسل يعمللي غصة في الحلق وما نطيقش ريحتو
2ـ مالحاجات القليلة اللي مدمن عليها ومانجمش نعيش بلا بيها هي القهوة...
3ـ ما نتبعش الكورة وقليل ما نتفرج في التلفزة
4ـ كيف نقوم الصباح نحب نسمع "حبيتك تنسيت النوم" متع فيروز ، وفي آخر العشية كي ما نسمعش أم كلثوم نبدا نزُنّ وحدي في "ليلة حب" والا "هذه ليلتي" والا أي رايعة أخرى من روائع كوكب الشرق
5ـ نحب التطييب والبريكولاج ، ونكره الميناج
6ـ ... ما لقيت ما نقول ... سي ... اللعب هاذي متع البلوغوسفار ما تعجبنيش برشة... آما بره برك ، تضييع وقت...

الناس الكلها تطّقت ، آشكون قعد ؟

ولي عودة في مواضيع أكثر جدية

vendredi 22 février 2008

تكريز



توة مدة ما عادش نكتب في ها لبلوغ . والأسباب طويلة وعريضة وفيها ما هو شخصي وماهو متعلق بالمستوى اللي وصلتلو اليوم تن ـ بلوغز . ومن غير ما نحل منوحة ونقول كيما بعض اللخيان، اللي قبل خير من توة ويا حسرة على زمان بكري... نقول جوست اللي تن ـ بلوغز اليوم اختلط فيها الحابل بالنابل وولات المدونات أكثر من شعر الراس . ماعاد تنجم تتبع حتى شي عخاطر الناس الكل تكتب والناس الكل تحلل وكل يوم تلقى بلوغات جدد . ما عاد تعرف حد في هالمعمعة خاصة وأنو الناس اللي كنت مستانس بيهم يكتبو ديما ولاو يكتبو أقل بوسطوات من قبل ، تقولش عليهم هوما زادة كيفي آنا طارت عليهم النفحة متع الكتيبة .

آنا نتصور اللي البلوغ ظاهرة في طريقها للإندثار ، أو لنقل ظاهرة قاعدة تعيش في تغيرات جذرية : فمة أكثر فأكثر مدونين ، مواضيع متنوعة أكثر فأكثر مع اتجاه متزايد نحو التفاهة والسرعة والتدوين الإكسبرس ، حضور أكبر للملتيمديا (صور ، فيديو ، تدوين صوتي ...) وانحسار كبير في عدد المدونين النجوم... ما نعرفش فين باش يهز هاذا كلو... ربما لإندثار المدونات في أفق عام 2010 كيما تتنبأ بيه الفيديو هاذي.

المهم ، اليوم حبيت نكتب موضوع نفرغ فيه قلبي ، خاصة وأني عندي مدة ما كتبتش . فمة شوية رقابة ذاتية ، صحيح . آما فمة زادة قناعة اللي اللي قاعدين نكتبو فيه كلنا ما هو إلا حرث في البحر ومضيعة وقت . آما اليوم التكريز وصل لنقطة اللاعودة . ما فماش سبب محدد لهالغصة اللي قاعد نحس بيها ، في الحقيقة هي برشة أسباب توة نحاول نفسرهم في هالتدوينة .

شهرين لتالي روحت للبلاد ، أمي قاتلي اللي الحمام اللي بحذا الدار قاعد يفرغ خاصة مالنسا اللي ماعادش يمشيولو برشة . علاش زعمة ؟ عخاطر فمة إشاعة تقول اللي الحمام حرام . بالله من وقتاش ولى الحمام حرام ؟ تي الحمامات في بلادنا موجودة من عهد الرومان ، ولا المسلمين ولا الفرنسيس ولا غيرهم نحاو هالتقاليد هاذي من بلادنا ، يجي اليوم بوكشطة يطل علينا من تلفزة فضائية ويقلك "لا يجوز" . تي برا اتلها في بلادك وشوف عدد البطّالة في السعودية والا حالة الباكستانيين والهنود والفيليبينيين اللي مستعبدينهم وخلي كل واحد لاهي في أمورو. باهي ومبعد الحمام اللي طلع حرام بآش بش يطلعو علينا زادة ؟ التواليت حرام ؟ والدوش ؟ وبيت البانو ماقالش بيها السلف الصالح ؟ والصابون بدعة والشامبوان اثم من عمل الشيطان ؟ تي فين ماشين يا زحي ؟؟؟

المصيبة في هالبلاد هي اللي ماعادش حاجتنا بالتلفزات الأجنبية باش نغرقو في هالمصايب متع الإفتاء . إذاعة الزيتونة منو فيه زيتو يقليه . بالطبيعة قليل شكون يتجرأ ينقد إذاعة كيف هاذي على خاطرها كلام ربي وكلام الحاكم (مالمرات القلايل اللي المصالح متاعهم الزوز تتقابل في هالبلاد) . آما إيجا أسمع آش يحكيو في هالإذاعة المحنونة : أقرا ما نعرش آما سورة خمسين مرة توة تمحيلك الذنوب الكل . بعد كل آذان آقرا ما نعرش آما دعاء ، كي تدخل لبيت البانو قول وقول... كيف تدخل للحمام ... آه نسيت ... الحمام حرام !

تي بالله فين ماشين ؟ وأخطاونا من حكاية مؤمن وكافر وغناية تونس عربية إسلامية . كلنا توانسة ونعرفو اللي حد ما ينجم يعيش في هالجو الخانق متع عذاب القبر والجلود اللي تتشوى وتعاود تنبت والملايكة اللي تدعي على المرا المتبرجة والشيطان اللي يوسوس وما نعرش شنوة آخر . التونسي اللي يجي لباريز يشريلك الفودكا مالفري شوب ومن بعد يحكيلك على الهوية والإسلام والعروبة وصدام حسين البطل الشهيد . بالله يزيونا مانفاق والترهدين ، وآحنا شطر اللي يحكيو على الحق في الحجاب وضرورة الحشمة عندهم تجارب جنسية قبل الزواج . قداش من وحدة متحجبة تلقاها عاملة عملية ترقيع وقداش من مُصلي عاشر الزطلة والبيرة قبل ما "يتوب". تي يزيونا بلا نفاق براس أماتكم راهو شي ينطق !

وعلى ذكر الكبت الجنسي ، اللي يحب يتبع القواعد متع مجتمعنا اليوم ومتطلبات العصر ما ينجم يعمل علاقة جنسية كان وقت ما يعرس (نقولو كي يفوت الثلاثين) مع العلم أنو بلغ في الخمسطاش . يعني خمسطاشن سنا متع كبت ومتع مشاكل نفسية بين الشعور بالذنب (عخاطرو خزر للديكولتي متع الطفلة اللي قاعدة قدامو في الكار) وبين الرغبات الملحة متاع الجسد اللي مايطيقش حالة كيف هاذي. وللعلم الحالة هاذي تصير لأول مرة في مجتمعاتنا عخاطر قبل الناس كانت تعرس على بكري وما تستناش خمسطاشن سنا كبت وحرمان قبل ما تشبع رغباتها الجنسية . معناها اليوم عندنا جيش متاع مكبوتين ومحرومين وهاذي حقيقة واقعة ، وموش الصلاة والعبادة هي اللي باش تقتل الغريزة هاذي اللي ماهياش أكثر حيوانية من غريزة الأكل والشرب .

بالطبيعة فمة شكون باش يقوللي اللي أحنا (اللادينيين ، الكفار ، العلمانيين ، اللاييكيين ، الملاحدة ... كلها في قفة وحدة) ديما نحكيو على الجنس واللي أحنا هوما اللي مربطين ومعقدين... باهي يا سيدي... واللي يخرجلك عشرين ألف فتوى في منع التبرج والإختلاط بين الجنسين والسفور... واللي يقلك اللي شعر المرأة عورة وصوتها عورة واللي الماكياج حرام... زعمة هو المربط والا آنا ؟ واللي يقلك "إذا عصيتم فاستتروا" يشجع في النفاق والا لا ؟ والا المنافقين ما ينجموا يكونوا كان الخارجين عالملة واللاديننين وأصحاب الفكر الحر ؟

عاد كي روحت لتونس من جملة ما قابلت قابلت زوز مالناس نعرفهم مليح مليح ماللي صغار . كنا ديما نحلمو بأمريكا والخارج والفلوس والكرهبة وهوما الزوز بالذات يموتوا ويفناوا على الراب أميريكان . عاد كي روحت المرة لخرة واحد منهم نلقاه لحية وعرّاقية وسواك في يدو ، يحكي على كونو المسلم ما ينجمش يتبع برشة مذاهب فرد وقت : ما تنجمش تاخو أسهل ما قالو ابن حنبل وأبو حنيفة وتعمل مذهب على روحك ... الثاني... نلقاها دوّرها هارد روك وقاللي فديت من هالبلاد... بالله كان يحبو يردوها أفغانستان علاش ما يقولولناش ديراكت خلي واحد يشوف حل لحياتو ... يمشي يعمل حرقة لأمريكا والا حتى اسرائيل المهم نهجّ من ها البر...

آنا الناس اللي يحكيو كيما السيد اللول نعمل عليهم جو ، توة من حكايات "توباك" و "أمينام" وبقية الصعاليك متاع الراب والدروغ والزطلة ، ولالي فقيه زمانو ويفتي في صلاة الجماعة وفي آش قال فلان وآش قال فلتان . باهي ، مادمنا نحكيو عالمذاهب واللي حد ما نجمو نتبّعوا كان مذهب واحد ، ماو قولوا للناس آما مذهب قاعدين يتبعوا فيه ؟ قولولهم راهو الخرم متاع الفضائيات الدينية ما يصلح كان لجماعة ابن حنبل موش للمالكية . تي الزح إذاعة كيما الزيتونة يلزمها تفسر للناس الإختلاف بين المذاهب وآش معناها معتزلة وشيعة وخوارج وفي آشكون قاعدين نتبعو بالضبط . وفوق هاذا ودونو ، مواضيع كيف هكة ماهياش هي اللي ماش تخلينا نخلطو على "قاطرة البلدان المتقدمة" ونراترابيو التأخر اللي مازلنا حاصلين فيه ( بلاد كيما المغرب فاتتنا اليوم في عشرين ألف دومان).

السيد هاذا ولا يحكي بأحنا المسلمين مليار بشر باش نحرروا فلسطين . بالله نحب نقول للي يحكيو ديما باسم مليار بشر سيبونا يرحم والديكم . بلا أمة عربية بلا أمة إسلامية سيبونا فكوا علينا الهم اللي عايشين فيه يكفينا . كيما قال الآخر ما نحتفلوش بعيد الحب عخاطر عيب نحتفلوا بيه بعيد متاع نصارى في حين أخوتنا في العراق وفي فلسطين ضاربهم الظلم والقهر . مالا مادام فلسطين ما تحررتش لا نعيدو لا نفرحو لا نعملو شي ! بالله قولولي حتى لوقتاش وقضية فلسطين عاملتلنا كي مسمار جحا : "لا صوت يعلو فوق صوت المعركة" . باهي ، ستين سنا وفلسطين ما تحررتش... آش عملنا وجا مليح ؟ نقعدو نعصّدو في حكاية الوحدة والمصير المشترك وثوابت الأمة و"أمة واحدة ذات رسالة خالدة" . بالله نحب نعرف آش عندنا باش نربحو من 300 مليون عربي ضاربهم الفقر والجهل والتخلف ؟ والا انصر أخاك ظالما أو مظلوما ؟ وفينهم هاللي يحكيو عالعروبة وهوما ما يعرفوش يركّبوا جملة عربية صحيحة ؟ كيفهم كيف اللي يتكلم باسم الإسلام وما يعرفش يعرض الحمد لله بالصحيح .

بون ، السيد الثاني الرياكسيون متاعو هي متع التونسي دو باز : نفسي نفسي ، نهرب ومن بعد خلي تخلى... آنا متأكد اللي فمة منهم برشة ناس كيف هكة ، فاددين مالوضع والتدين المتزايد خانقهم ، آما حد ما يتكلم واللي يلقى بار يركش فيه والا فصعة للخارج ، آش يهمو في البلاد خلي تّتخذ.

بيان سير آنا ما فاهم شي مالحكاية والكلام متاعي ترف فكري ونستعمل في نفس الأسلحة الديماغوجية متع الإسلاميين . باهي داكوردو ، آما نهارة اللي يصير في تونس اللي صار في إيران عام 79 توة نشوفو شكون عندو الحق . ونهارة اللي تفوتنا المغرب وليبيا والموزمبيق تو نفيقو على رواحنا ونندمو وقتللي ما ينفعش الندم . هالعريبة ما ينفع منها شي ، كي مصر كي سوريا كي الخليج ، كان باش نربطو مصيرنا بمصيرهم يا خيبة المسعى ، ما عندنا فين نوصلو . والمنطق متع الشروق والصريح ومثيلاتها قاعد يهدم في أجيال كاملة ويغذي في التطرف وضيق الأفق ، ومن غير ما نحكيو على اقرأ والناس والمجد والوسائل الأخرى متع تشجيع الرجعية والسلفية . ابكي على حال الإعلام في تونس ، وعلى حال الثقافة وعلى حال التعليم وعلى حال الفن ووسائل الترفيه... وابكي على حال جيل كامل ضايع ما بين بوش وما بين بن لادن ما ينجم يخزر للعالم إلا بمنطق صراع الحضارات والمؤامرة الصهيوصليبية . ها الإعلام بودورو عمرو ما فهم اللي قضايا التوانسة عمرها ما كانت تحرير فلسطين وإلا كاس افريقيا.... احكيولنا عالخبز والشوماج والهجرة السرية وعاللي باش يصير في 2009. قولولنا راهو فمة برشة فدوا وبرشة يستناو في تغيير كبير وبرشة يحبوا يتنفسوا. سمّعونا أصوات الشباب اللي ما عاد يعنيلهم اسم تونس كان غناية "بلها يا بلها" في الكوب دافريك .

آخر طلعة قلك تونس كي ربحت ماتش في كاس افريقيا كانت على خاطر الملاعبية متربيين ومتدينين وعطاو الفلوس للقلالة في المدينة اللي لعبوا فيها... على حساب هكة مالا كاس افريقيا اللي هزيناها في 2004 بفضل الزوز كفار لومار وسانطوس كيفاش نحسبوها ؟ وزعمة الصحوة الدينية هي اللي خلات الألمان سلاطين متع كورة ؟ والبرازيل ؟ عخاطرهم مسيحيين ملتزمين بتعاليم دينهم ؟ سيبونا وانتوما ربي تدخلو فيه في كل شي .

من جملة الحاجات اللي تعلمتها في تن ـ بلوغز هي كونو فمة ناس متعلمين وواصلين يقولولك اللي بما أنو تونس فيها 98 % مسلمين ، فإنو الأغلبية هاذي من حقها إعلان دولة إسلامية !! لا باس ماو ؟ سافابا يا ولدي ؟ شكون حطك تحكي باسمهم الـ98 % هاذوما وشكون قالك أصلا اللي ماذابيهم الدين يتدخل في أمورهم الشخصية. الناس هاذم موجودين ، ويكفي أنك تقرا التعاليق الأنونيم باش تفهم حجم المصيبة اللي وصلنالها .

وقبل ما نكمل (رغم اللي الحديث ما يوفاش وقلبي معبي) نحب نعلق على اللي قالوا عماد حبيب وممكن ما عجبش برشة ناس : سيدي محرز ، اللي حما الجالية اليهودية واللي يقدسوا فيه التوانسة اليوم هو اللي أباد الشيعة من بر تونس . إي نعم أبادهم ، بصغيرهم بكبيرهم ، وكيف الجنود كانوا يشكّو في عبد ويجيو يشاوروا سيدي محرز ، كان يقلهم : "اقتلوه فإن كان منا فهو شهيد وإن كان منهم فقد استرحنا منه". الشي هاذا واقع ، واللي يقول في الكلام هاذا قاعد يقول في حقيقة تاريخية ، وماهواش يجرح في المشاعر الدينية والا الوطنية . وهاذا مثال برك على التقديس متاعنا للتاريخ اللي ما نعرفو منو شي . ديما نتخباو ورا كلام كبير من نوع الحضارة الإسلامية العظيمة والمفكرين الكبار والفلاسفة المسلمين واحنا ما عندنا عليهم حتى أدنى فكرة

الحاصل ، تكريز وبرة

lundi 4 février 2008

Le rêve d'Olmert

« Les gazaouis sont des égyptiens, tout le monde finira par admettre cette vérité. Les voilà, ces Arabes, aujourd'hui appelant à ce que les égyptiens laissent les frontières ouvertes. Qu'ils les laissent ouvertes, ces frontières ! Ce n'est pas mes oignons. Qu'ils règlent leurs problèmes entre eux, qu'est-ce qu'on a à faire là-dedans ? Moi je n'ouvrirai pas mes frontières.

Depuis toujours, ici en Israël on a compris une chose : ne compter que sur soi-même. Seuls nous avons gagné toutes les guerres qui nous ont opposés à nos ennemis. Seuls nous règleront le problème palestinien. Oslo mon œil. Deux Etats ? Oui, bien sûr... »

Olmert se frotte les mains et se tourne vers la Cisjordanie en chuchotant : « Même stratégie, même combat : de plus en plus de territoire, de moins en moins d'Arabes. Peut-être la prochaine étape serait de faire un embargo sur Ariha, dans l'espoir de voir les cisjordaniens forcer les frontières et tendre le bras vers leur frères de l'autre rive du Jourdain ? Et peut-être, au final, le roi Abdallah annexera Ariha ? Les Arabes ont la mémoire courte : quand ils ont perdu Jérusalem-Est, elle était sous administration du roi de Jordanie. Tout ça n'est qu'un seul pays, de par et d'autre du Jourdain. L'actuel Royaume de Jordanie contient 60 % de citoyens originaires de la Palestine. Le pays des cisjordaniens est la Jordanie. Le pays des gazaouis est l'Egypte. Voilà. L'affaire est close. Qu'on n'en parle plus. Pendant ce temps, Israël annexera le maximum de colonies en Cisjordanie. Tant que les pourparlers sont au point mort, on peut jouer cavalier seul. Comme on l'a toujours fait.

Oui, Israël a toujours fait des erreurs. Mais à chaque erreur commise il y a toujours quelqu'un en face pour commettre une erreur encore plus monumentale. Donc il n'y a pas de risque. La même politique qui a permis à Israël d'exister pendant 60 ans doit pouvoir lui assurer une existence encore plus longue. Et le jour où les Européens se réveilleront pour se rendre compte que la Seconde Guerre c'est quand même une histoire lointaine, ce jour-là Israël n'aura plus besoin des Européens -ni des Américains- pour exister. Car Israël à ce moment-là aura bâti sa légitimité sur autre chose que la culpabilité due à la Shoah. Il aura une place au soleil grâce à l'industrie, au tourisme, à l'agriculture moderne, aux technologies de pointe, à l'innovation et à tous les facteurs qui font de ce lui une réussite économique.

Stratégiquement, les bonnes alliances feront les bonnes affaires. Turquie au nord, Egypte à l'Ouest et Jordanie à l'Est -tant que ces pays sont gouvernés par des non-islamistes-. Pour le long terme, l'Inde, et pourquoi pas la Chine, les nouveaux leaders mondiaux. Et les Arabes ? Les laisser faire, autant que possible. Plus ils sont en colère plus ils font n'importe quoi. Et si jamais débordement il y a, il y aura toujours des têtes nucléaires à Dimona pointées sur la tête de celui qui ose aller trop loin.

Aujourd'hui la Palestine n'a plus de visage. La force d'Arafat était d'incarner la Palestine. Qui les incarne désormais ? L'OLP ? Sans ses leaders historiques et sans assise populaire ? Le Fatah, avec un Barghouthi prisonnier et des leaders à la réputation entachée par la corruption ? Non, pas Mahmoud Abbas non plus. Surtout pas lui. Sans charisme, on peut gouverner un pays paisible et démocratique comme la Suisse mais certainement pas des territoires fragmentés et un peuple affamé et emprisonné. Quant au Hamas… ils sont comme les autres : beaucoup de bruit pour rien. Laissez-moi vous dire : nous sommes seuls sur le terrain, et c'est tant mieux.


Tout ce que j'ai à faire est de tenir bon jusqu'aux prochaines élections. En Israël, on n'exige pas que le Premier ministre soit compétent. On ne lui demande pas de régler les problèmes avec les voisins. Tout ce qu'on lui demande c'est de faire durer le jeu et de subir le moins de dégâts possibles, et à souhait, aller provoquer les autres, les maintenir sous pression. Exercice pas très compliqué somme toute. Ce qui explique en partie pourquoi j'ai pu tenir aussi longtemps… »