vendredi 23 mai 2008

شدوني لنطيح


اليوم آنا في حالة صدمة وذهول ... بعدما قريت بعض المواضيع المنشورة على البلوغوسفار المحنونة اقتنعت (شدوا رواحكم مليح...) اللي فمة سباق في الغرب على اعتناق الإسلام !!!

إينعم سباق على اعتناق الإسلام ! تي هو حتى فيلم "فتنة" اللي ما قالش في الإسلام كلمة خير خلا 3 هولنديين يبدلوا دينهم ويتوجهوا للإسلام ! إينعم ثلاثة !! خلي عاد الناس اللي ولات مهتمة بالإسلام وبتاريخو والأمر هذا معروف ومعلوم ونتيجة من نتايج غزوة منهاتن المباركة...

بالله يا ناس يا عباد الله ، مؤمنين وملحدين ، اللي يمن ببقرة واللي يمن بلفتة والا حتى بخنفوس ، بجاه ربي أرحمونا . تي شنوة آش قلك آش قال عليك عدد المسلمين فات عدد الكاثوليك باعتراف الفاتيكان . باهي يا سيدي . وكي نحسبو المسيحيين الكل (كاثوليك وأرثوذكس وبروتستانت وإنجيليين ...) زعمة قداش تطيح الحسبة ؟؟ والا المسلمين يطلعوا خاسرين في النازلة (حقه المسلمين بالشيعة والا بلاش ؟؟) . وهانا خاسرين على طول الخط ضد الشناوة مالا دين الشناوة هو الصحيح ومن غدوة نوليو الكلنا نصليو للرفيق ماو ونتعلمو الكتاب الأحمر؟ .

ياخي من وقتاش القوة متع دين تتحسب بعدد الأتباع متاعو ؟ الإجابة ساهلة : من أول الدنيا . ياخي رسول الإسلام ما قالش تناكحوا تناسلوا فإني مباه بكم الأمم ؟ وأنبياء بني إسرائيل ما كانوش يشجعوا عإنجاب الصغار باش كلهم يوليو جنود في جيش شعب الله المختار ؟ آما الناس اللي تحسب في حسب كيف ما هكة عمرها ما تسائلت هل أنو خير يكون عندي 10 ملاين بشر متعلمين وعايشين في مستوى باهي والا 100 مليون عايشين في ميزيريا وشطرهم يضربو في البطالة . أحنا في تونس في بالي فهمنا الحكاية من هاكة العام وعملنا التنظيم العايلي وإلا رانا اليوم نعانيو في نفس المشاكل متع مصر مثلا . الحاصل ، هاللوجيك هاذي متع أحنا أكثر منكم لعب أولاد صغار . هام اليهود في اسرائيل خمسة ملاين ، آش استفدنا أحنا العرب مالثلاثميات مليون عربي مالمحيط إلى الخليج ؟؟

وبرة عاد احسب قداش من واحد يمشي للجامع وقداش من واحد يمشي للكنيسية في منعرش آما بلاد ، وبالطبيعة ديما المسلمين رابحين عخاطر الأرقام ما تعطيش الصورة كاملة آما تخدم في فكرة معينة وتنتقي في الأرقام اللي تناسبها برك . وأحنا في بلادنا مستانسين بالطريقة هاذي : وسايل الإعلام متاعنا ما تحكيلنا كان شطر الحقيقة عخاطر الشطر لاخر ما يعجبش .

وهاو ماش نعطيكم فكرة على الشطر اللي ما يعجبش : قداش من مواطن عايش في بلاد إسلامية وهوما ماللي تولد يحسبو فيه مسلم وهو ما هواش مسلم ؟ قداش من واحد خرج من دين الإسلام وما قال لحد ؟ باهي ما عليناش في اللادينيين اللي يبقاوا ديما أقلية وهاو نمشي معاكم في اللوجيك متاع حومة ضد حومة : قداش من دزيري ولّى مسيحي في ها لعويمات لخرة ؟ قداش من مغربي والا حتى تونسي تنصّر بفضل الصورة اللامعة اللي عملها بن لادن للإسلام وبفضل زادة جمعيات التبشير اللي ماشية آ فون في لوجيك جمعيتي أقوى من جمعيتك ؟ وفي وسط المسلمين هوما بيدهم ، قداش من "مسلم" زبراط وسارق ومجرم ؟ وقداش من واحد سكارجي وقليل حيا ؟ بالله امشي لاسطنبول وشوف الشباب اللي يخرج يسهر والبيرة اللي تتباع عالطريق . زعمة آما أكثر ، البنات المتحجبات في اسطنبول والا البنات اللي يشربوا ؟ وسلملي على أردوغان وحزب العدالة والتنمية اللي باش يرجّع الخلافة (العرب كانوا أول من ساهم في تفتت الخلافة العثمانية قبل ما يكمل عليها أتاتورك).

الحقيقة هو كونو موجة اعتناق الإسلام هاذي موجودة من أول الدنيا وماهياش سكوب جديد . من أول الدنيا الناس تبدل في الدين متاعها إما على اقتناع والا ماخذة في الخاطر (كيما القاوري والا القاورية اللي يعرس بمسلم) والا بقوة السيف والا للتمتع بالامتيازات الجبائية (كيما أهل الذمة في بلاد الإسلام) . الحاصل ، الشي هاذا ماهواش جديد وماهواش خاص بالإسلام عخاطر اليوم حد ما يحكي عالغربيين اللي يتحولوا للبوذية . آما البعض مالإخوان المدونين ولاو اختصاصيين في النوعية هاذي متع المواضيع بودورو اللي يتحفونا بيهم من وقت لآخر .

5 commentaires:

@tem a dit…

Salut Mani, je suis d'accord avec toi y'a rien de nouveau quant au changement de réligion, ça part dans tous les sens, et il n'y a pas de statistique fiable quant au nombre. Y a pas de quoi en faire une histoire dans un sens comme dans l'autre et que chacun se spécialise dans ce qu'il veut! A ta place j'aurai laissé un commentaire sur le post en question parce que là c'est limite de la provocation gratuite de ta part. Avec tout mon respect.
"si jamais tu tombes ne te casses pas la gueule!!!"

brastos a dit…

وقت اللي نسمع و الا نقرا كلام يصب في هالاتجاه هاذا .. من نوع : نحنا أكثر .. نتخيّل روحي في برنامج من برامج التصويت بالموزع الصوتي .. ستار اكاديمي و الا شنوّة ...
...
ليعبد الجميع ما يشاؤون و من يشاؤون
تلك قضايا شخصية ..
لكن الاهم هو الانتماء الى قيم العدل و الحرية و المساواة

Dodo a dit…

Brabi rit rit kifeh??? rana faddina mel wa3dh wel irchéd!! Elli 7aj 7aj welli 3awa9 5aliweh y3awe9 la kawen fih... Kol we7ed ya3mel li y7eb wyeziwna mahal 7sébét lbidouna!!! 3omrekchi sma3t i7sa2 9adeh men we7ed chrétien??? Ti kifeh ye7sbou fiha l7kéya?? Sondage?? Wala dé5lin fi m5a5 l3béd!! Ya walla 7wééééééééééééél
Bravo Mani

Sosso a dit…

ça me rappel mathalayn wa7ed 3ammi maset yqoul : : elqasseba teqsib wel ta... te7seb
et le 2é
wa7edon kaalf waalfon ka offfffff.
Et là je crois qu'on a plusieurs centaines de millions de offffff et off

nasr a dit…

صنعة اللي ما عندو صنعة