mercredi 4 juin 2008

حق الرد


اكلي قلك شدوني لنطيح بعد الصفعة الموجعة الي وجهالو خونا عمروش وراه الي يقول فيه ويعمل فيه مجا شي نحكي على كالسيد الي لعبها نسر من نار و هو بحيوط ميجيش.

الظاهر اللي السيد يقصد في شخصي المتواضع . وبما أنو يحب يعمل منها قضية شخصية ("نعرف الي التدوينة هاذي باش تألب علي برشة ناس") آنا باش نرجعلو الصرف متاعو وباش نوريه اللي ما فماش مشكلة متع عقم هجومي كيما يدعي . السيد قاسمها محور خير ومحور شر ("ندافع على صحابي كي ولات فيها سياسة احلاف") وحاطط الناس اللي ما همش كيفو في محور الشر . باهي مالا هيا بنا نلعب يا تيتوف .

يا سي تيتوف (هاني نعملك في قدر نسميك فيك باسمك ونزيد نكسرلك السين) ، ماك تحكي عالناس اللي تهز وتسبط ورينا إنتي آش تعرف تعمل ؟ هاو كي يولي حديث سريو ما تجيش تحكي وتعبر وتسمعنا الحجج متاعك ؟ يا إنسان ماني مقلقك آنا ، إيجا نحكيو بالرياض علاش السبان من تالي لتالي ورميان المعنى ؟ هاو كي نحكي ع نيتشه ما تجيش تحل كشختك سي الشباب ؟ والا ماعندك ما تناقش كي يولي نقاش بالحق ؟ هاوكة عملت ما نعرش قداش من بوسط على العلمانية ، ما جيتش تكلمت ؟ والا زعيم كان في الحديث عالتطرف العلماني وكلام مطيش في الهوا قال شنوة حاقدين ويكرهونا وهات من هاك اللاوي ؟ وكي حكاو بعض الزملاء على التجديد الديني عملت زوز تدوينات موش وحدة وكسرت راسي باش نوصل الأفكار اللي عندي من غير ماتتخبش مشاعرك ومشاعر غيرك . آما زايد ، بما أنك جيتها بمنطق أحلاف وحماس ضد فتح وهاك اللوغة ، ما ينفع معاك كان الحديث اللي تفهمو . ماتحشمش ع روحك تتمنيك على واحد في عمر بوك قالك يفسد في الشباب ، ياخي الإسلام اللي تتشدق بيه ما علمكش الإحترام ؟ في بالك سقراط كي أعدموه شنوة كانت تهمتو ؟ إفساد الشباب وعدم احترام الآلهة ! مازلنا غادي من هاك العام . سامحني عاد ما تدوخليش كي نحكيلك ع سقراط ، نعرف اللي الشي قوي على مخك آما ميسالش تبع معاي شوية .

نتحداك يا سي تفتوفة ـ عفوا... تيتوف باش تجي تكومنتي عندي في المواضيع اللي كتبتها ومازلت باش نكتبها على الدين وعلى الفلسفة بصيفة عامة ، وقتها أتو نحكي معاك . آما آنا متأكد اللي انتي عاجز أصلا على النقاش ، بمعنى آخر عندك عقم هجومي ودفاعي زادة (هاني زدت بلصتها) . يا سيدي نتحداك تجي تحكي معاي عالفرق بين السنة والشيعة ، ومن غير ما تمشي تعمل كوبيي كوللي من سيت متع جماعة سلفية كيما عملت قبل مع عماد حبيب (هاو البوسط متاعك ، وهاو منين جابدو).

الحقيقة آنا مانيش فاهم ربي موكلك خليفة على عبادو والا كيفاش ؟ والدين اللي زعمة زعمة آنا وغيري نهاجمو فيه حاجتو بسيادتك باش تدافع عليه ولا شنوة الحكاية ؟ وتزيد تعطينا دروس في الوطنية من فوق ... ماك تحكي عالأحداث متع قفصة ، هاو آش كتبت آنا على قفصة وعلى المرحوم هشام (1 ; 2 ) . المرة الجاية أجمع واطرح قبل ما تبدا تتكلم بالباطل . وفوق هذا ودونو آنا شخصيا نكتب عاللي نحب وكان عجبك ، تخرالي فيه كيما تقول إنتي .

آنا الناس اللي كيفك شابع منهم في هالبلوغوسفار متع زحي . آما المرة هاذي باش نعمل عليك بون كيف . علاش ؟ ع خاطر عندي برشة ماريتش هالمستوى هذا في الحوار (إذا كان ما زلنا نسميوه حوار). برة شيخ روحك ... نبر ... أعمل اللي تحب ... ههههههههههههههه ... توة ربي يحسبهالك حسنات مادامك تجاهد في الكفار أمثالنا ... يا متاع حماس يا قوي ياللي باش تحرر القدس بالتجوبير متاعك .

22 commentaires:

Legend Of The Fall a dit…

آآآآآآآآآه. والله آش باش انقولك؟ رانا انعانيو في مصيبة زرقة في هالبلوغسفار. مافهمتاش كيفاش هالعباد يعيطو و يصيحو عل الحرية و حقوق الانسان و حق التعبير و هوما أكثر عباد ديكتاتوريين.
و من الفوق، مافهمتاش علاش يتحدثوا عن الدين برشا؟ ياخي هوما برك مسلمين و البقية كفّار؟؟؟ مافهمتيش علاش ديما هاك المنطق التخويني متاعهم و كيّانا أحنا خونة و عملاء و كفّار و بايعين القضية و الأمة. مرّة شريت سابان دو نوال. حبّيت نعمل عليه بون كيف مع خويا الصغير و نزينو الشجرة. ما كان عندي عندي خلفية لا دينية و لا ثقافية. واحد من أصحابي شافها ووجهو تقلب. حمار و زراق و نفخ ريشو و قالي: "انت فرحان بروحك توّة؟ تي انت وليّت كافر. كان جيت أنا في بلاصتك لاما نمشي اندوش و نتوضا و نمشي انشهد قدّام الامام في الجامع". تصوّر؟ هاذوما عباد باش انتقدمو بيهم و نحسنوا بلادنا و نحرروا أراضينا؟ و من الفوق، مافهمتاش علاش ديما يحكيو على الدين. ما هو الدين أمر شخصي. و من الفوق في تونس عندنا مسيحيين و يهود و ملحدين من حقهم الكل إنهم يكونو توانسة و أنو ما نقصيوهمش و بالتالي ما عادش نحكيو على الدين. إي نعم، أنا مع إلغاء الفصب الأول متاع الدستور على خاطرو يفرض دين الأغلبية، اللي أنا منهم، على أقليات عندي أصدقاء من بيناتهم. حاصيلو، كيما يقول صديقنا تيتوف و أصدقاؤو في البلوغ: فرهدتلي على قلبي و بردتلي دمي

3amrouch a dit…

على حد علمي سقراط قتلوه لانو كان يؤمن بالله ويعتقد انو فما حياة بعد الموت ويدعو في الاسواق لله الواحد الاحد وكيف حكمو عليه بشرب السم قللهم سيب عليكم مني راني عجوز وباش نموت احسن مالي تردوني شهيد هههههي يعني الاستشهاد متاعك بيه نرى انو موش في محلو صحيح هو لم يقدم اجوبة لكن ديما كان يطلب من الناس قبل مايحاولو يعرفو الكون انهم اولا يحاولو يعرفو انفسهم والفاهم يفهم.
بالنسبة لعدم الاحترام الي تصف به في تيتوف فمى مثل يقلك عز نفسك تصيبها شخصيا كيف يبدا انسان في عمر جدي ويبدى يحكيلي على الكعالص وكلام زايد وكيف يختلف مع الناس يصفهم بوجوه اللوح صعيب انو حد يحترمو وزيد الاحترام استحقاق ماهوش هبة.
بالنسبة لحكاية الاستجابة والتعليق على بعض المواضيع موش بشرطه يكون شي ناجم او ناتج عن جهل او عدم اطلاع لكن للناس فيما يعشقون مذاهب اذ انتي تحكي في مواضيع متهمنيش وانا منجيش نعلق تنعتني بالجاهل وعدم الفهم ؟؟؟؟ موش هذا مايسمى بتضخم الانا؟
العلمانة ولا الادينية ولا غيرها من الموضيع لاتستهويني ونعتبرها ترف فكري كيف تحبني يام اناقشك ياما راني جاهل ومانفهم شي.
علاش مانقلكش انا راي الفلسفة الي تتشدق بيها قليلها يدفعك للالحاد وكثيرها يعود بيك للايمان؟ على حسب هاالمقولة مازلت مبتدا امالا انتي فلسفة؟؟؟
قريت مرة انو على ماتذكر كانط قاللهم رانى لن نصل لحقيقة هذا الكون كان بعقولنا فقط، فعقولنا هي جزء من هذه الحقيقة التي نبحث عنها....يعني واحد مع واحد يساوي اثنين هي حقيقة خاصةبعقولنا فقط نحن البشر....اذ تعرف هذا علاش تتهمني بالجهل.
نختم بسؤال كيف انا رجعي وعايش في عام واحد هجري والامور تطورت وافكاري ماعادش صالحة علاش تستشهد انت بافكار جماعة اثينا الي خلقو الفلسفة وعلاش تحاول تطبق افكار روسو و" فولتير" و"لامارتين وغيرهم من فلاسفة التنوير موش هوما بيدهم ماتو وشبعو موت.
فقط معرفتش علاش ديما متحامل على البلوقوسفير وماتفلت حتى فرصة باش تحكي على كرهك ليها؟؟؟ خلي الناس تعبر وكل قدير وقدرو.
من غير مانطلب منك رفع المستوى نعرف قيمتك لكن مانردوهاش لعب زغزغ وسيدي سيدي هو بدا
والسلام

3amrouch a dit…

سؤالي اخير وموش من باب استعرض عضلاتك لكن اختلطت علي الامور ومن بعد لك عهد اني ماعادش نقلقك
مالفرق بين المانوية والمسيحية؟
ياخي كل واحدة على حدة ولا امتداد لها؟

titof a dit…

تو فقت بيه البوست متاعك يا متواضع
وكنت باش رد عليك في قداش من بوست اما حكاية فارغة
وباش متقولش هارب من الرد و فاصع الاسبوع هذا مخصص ليكم فردا فردا
وكل واحد باش الرد عليه تهنى يا متع الفلسفة
و بالنسبة لراجل الكبير الكبير ربي راو @diana
بربي كي الرجال تحكي ............
@3mrouch
مرة جاية خويا الباهي نحبك طيحو بربي على خاطر هاو مزال فيه نفس

الله أكبر a dit…

chemjabedna fil far9 bin sonna wi chi3a....
tawa t7ebbou ta7kiw 3lé tafahet mta3kem allez y...mé a5ouya le7keyet elli plus developpé ne sont pas à la porté de tt le monde...
Mais bon je voulé dire beb el 7iwar dima maftou7 " sans copier coller" ( 7atta 3amrouch 3andou lcopier coller , lol min islamway.com) ( 3amrouch ma titrachech 3ad c juste illégal ce ke tu fé c tt)
bref, voilà arretez svp vos conneries, celui qui est musulman yemchi ysalli, w yekteb 3al islam w yoskot, welli kefer, yekteb 3ala kofrou amma sans insulter les autres...car insulter c'est blessant et entraine des insulte de l'autre coté.... et mène à des postes commes celle ci,
Je ne sais pas si vous trouvez un plaisir a vous vous insulter ou koi?
Regarder les occidentaux i ont internet depuis des années et sur leurs blogs, jamais un moine n'insulte un athé ni le contraire...
Soyons GRAND ! et RESPONSABLE svp
wessalem 3ala man ittaba3a lhouda !

Legend Of The Fall a dit…

تيتوف: يا خي أنا جبدتك توّة؟ أنا علقّت على مقالة كتبها سي الراجل. ياخي حلال علينا حرام عليكم؟ و علاش تسكّت فيّا؟ أنا في بالي اللي العباد الكل خذاو حقوقهم رجال و نساء و غشاشر. و النشاء و الغشاشر أكثر حتى من الرجال

Mani l'Africain a dit…

إلى عمروش :

شخصيا ما فيباليش اللي سقراط كان يدعو للإيمان بالله الواحد ، آما القضية ما هياش لهنا ، القضية هي في كونو سقراط اللي كانت أفكارو سابقة لعصرو وكان يدعو لإعمال العقل والتساؤل أعدموه بتهمتي الإساءة للآلهة وإفساد الشباب . يعني الزوز تهم هاذم يصرافو ديما وديما صالحين مهما يكون الفكر اللي تحملو بشرط أنو يكون فكر ما يدخلش في مقاييس المجتمع اللي عايش فيه . نشالله تكون فهمت علاش استشهدت بسقراط .

عدم احترام تيتوف لعلي : ياخي المبادئ متع الإسلام تجي لهنا وتاقف ؟ آنا لمت على تيتوف كونو يتشدق بالأخلاق الإسلامية ومنبعد يسب راجل في عمر بوه . والا على خاطر سيدي علي ماهواش حاج ؟؟ بالله إذا كان أخلاق الإسلام ما تتطبق كان عالمسلمين قولولنا . يعني الإسلام يدعو إلى مكارم الأخلاق بين المسلمين فقط آما بالنسبة للناس اللادينية والهندوسية والمسيحيين إلخ ما عندهم حتى حق في الإحترام . موش هكة المنطق اللي تحكي بيه والا آنا غالط ؟؟

بالنسبة لحكاية الاستجابة والتعليق على بعض المواضيع : كيف واحد يقلك العلمانيين بيهم وعليهم ، يعني إنتي مستعد تحكي عالعلمانية وتبين اللي هي غالطة صحيح والا لا ؟ وقتلي تقول اللي اللادينيين حاقدين عالإسلام وتنشر مواضيع اللي الإسلام أحسن دين إلخ... يعني اللي انتي مستعد تثبتلنا اللي الإسلام "صحيح" في مقابل المذاهب الفكرية والدينية والأخرى... علاش مالا كي يتطرح موضوع جدي (علمانية ، نظرة علم النفس للدين ، أفكار نيتشه وغيرو وهاذي كلها مواضيع كتبت فيها) ما تلقى حت حد يجي يتناقش ؟ واحد كيما تيتوف ما فالح كان في العرك والخصام ما ريتش شطر حجة (أرغيمون) فاللي يحكي فيه .

إذا كانك تتصور اللي آنا عندي تضخم الأنا ، موش مشكل كبير ، تنجم تتصور اللي في بالك ، عكل حال ما نعرفوش بعضنا في الدنيا وحكمك نابع ماللي ننشر فيه لهنا دونك ممكن تكون صحيح وممكن تكون غالط .

ملاحظة عامة : آنا ما نعتكش بالجهل يا عمروش وكلمة جهل ما استعملتهاش ، وما نحبش نطيح في لعبة الأحلاف اللي طيحنا فيها تيتوف ، يعني اللي حكيتو في البوسط السابق كلام موجه لتيتوف موش ليك (وحتى هو ما نعتوش بالجهل بل بالتهرب من النقاش)

إذا كانك تؤمن اللي الفلسفة قليلها يدفعك للالحاد وكثيرها يعود بيك للإيمان ما عليك كان تجي نحكيو باش تقنعني ، موش تقلي جملة مطيشة فالهوا . عخاطر حتى آنا نجم نقلك اللي برشة إيمان ما ينجم كان يقودك للإلحاد .

تقول انتي اللي كانط قال اللي الحقيقة ما نجموش نوصلولها بعقولنا فقط عخاطر عقولنا هي بيدها جزء من الحقيقة التي نبحث عنها . باهي آنا موافق معاه وهاذي فكرة موجودة عند برشة فلاسفة . لكن كي تنحي العقل آش بقى ؟ القلب ، العاطفة ، الحدس ... ؟ هاذي كلها معايير ذاتية يمكنها تحدد حقيقتك إنتي موش حقيقتي آنا . وزيد كيف تقرا فرويد وتفسيرو النفسي للأديان تفهم اللي هالمنطلقات هاذي (التجارب الروحانية ...) عندها تفسير علمي مقبول ما يستندش لحتى قوى خارقة للطبيعة . وسبق وأني كتبت على تفسير فرويد للدين وإذا كانك ماكش موافق معاه آنا مستعد نتناقش . وكي تقلي اللي هاذا الكلو ترف فكري وقتها ما عندي ما نحكي معاك عخاطر الحديث الكل يوفى وقتها .

مرة أخرى نزيد نقلك اللي ما تهمتكش لا بالرجعية ولا بأنك عايش في عام واحد هجري . وعكل حال الحقيقة تنجم تكون موجودة فاللي قالوه جماعة أثينا واللي قالو محمد واللي قالو روسو . المهم الأفكار ، موش كونو اللي جاب الأفكار هاذي ميت والا حي . آما ما تنساش حاجة عيش خويا عمروش ، هو كونو الإنسانية تتطور واللي الثورة الفكرية اللي صارت في القرون الماضية ما نجموش نتجاهلوها ونقولو أحنا عندنا كل شي في القرآن والسنة وما حاجتناش باللي قالو فولتير الكافر والا نيتشه والا غيرو . حاجة أخرى يا عمروش ، الفلسفة راهي ما وقفتش عند نيتشه والا عند ديكارت ، الفلسفة أفكار ومذاهب قاعدة تتطور وتتثرى نهار بعد نهار وما نعرش علاش اليوم ما نحكيوش على الفلاسفة اللي عايشين اليوم باعتبارهم هوما أقرب لينا ويخزروا لتاريخ الإنسانية من نفس المنطلق اللي أحنا نخزرولو بيه .

آنا والبلوغوسفار حكاية قديمة . وشطر التدوينات نحيتهم من هالمدونة دونك ما تنجمش تعرف آش صار قبل . عكل حال آنا نشوف اللي البلوغوسفار تعكس حالة مجتمعنا التونسي واللي هي حالة ما تعجبش ، ومن حقك ما توافقنيش في الراي هاذا .

Mani l'Africain a dit…

إجابة على سؤالك اللخر : المانوية دين حاول يوفق بين الزرادشتية (ديانة الفرس القديمة) واليهودية والمسيحية (ماني كان عضو في طائفة مسيحية عندها أفكار بعيدة عالمسيحية اللي نعرفوها اليوم). وفمة شكون يقول اللي حتى البوذية داخلة في اللعبة عخاطر ماني حب يعمل دين يلم الناس الكل الموجودين عالأرض في الوقت هذاكة . الدين هاذا فيه برشة تسامح ويقال أنو ماني رفض نشر المانوية بحد السيف رغم أنو كان مقرب مالإمبراطور الفارسي في الوقت هذاكة . حاصيلو ، ماني مات مصلوب وأتباعو قعدو يقولو اللي هو حي (ماني ـ حي ، ومنها جات مانيخيوس باليونانية) . ماني مات حوالي 270 بعد الميلاد حسب ما نتذكر وآخر مانوي مات في القرن 13 . الكنيسة المسيحية كانت تعتبر المانوية عدوها الأول وعملت كل شي للقضاء عليها . للإشارة فقط ، القديس أغسطين أحد آباء المسيحية (واللي أصلو من شمال إفريقيا) عاش 10 سنين مانوي قبل ما يتحول للمسيحية .

Mani l'Africain a dit…

شوف سي التفتوفة ؛ آنا ما نقولكش يا بهيم عخاطرني يغيظني البهيم كي نطيحلو قدرو . هاني قريت الرد متاعك المفحم ومازلت نستنى في الطير الأبابيل يجيو يرجموني ، شبيهم بطاو ؟

يا حنكيش : الناس اللي تحكي بالإسلام ما تعرفش تفسرلك حاجة بديهية كيما الفرق بين السنة والشيعة . وشطرهم ما يعرفوش اللي سيدي محرز اللي يقدسو فيه قتل الشيعة في تونس حتى لآخر واحد . تي كانوا كي يجيبولو واحد يقلهم "اقتلوه فإن كان منا مات شهيدا وإن كان منهم استرحنا منه"

سامحوني عاد كان مسيت بالمقدسات وتخبشت مشاعركم الدينية الرقيقة بهالكليمتين اللي قلتهم على سيدي محرز

ديانا : مرحبا بيك

3amrouch a dit…
Ce commentaire a été supprimé par l'auteur.
3amrouch a dit…

اعمللنا انتي بلوقسفير تكون كيما مدينة افلاطون مليئة بالحب ومايموت فيها حد لاجل افكارو هههه اما نصيحة ماتبعوش هو وتعملها مثالية لا مشاكل فيها ولا الم بالعكس اعملها واقعية وزيدها كثير من الحب وقليل من الفلسفة يمكن وقتها نجي نطل عليك.

عاشور الناجي a dit…

يا عمروش يهديك

افصل بين قدوتك أو رسولك وبين روحك


لأن محمد شخصية تاريخية يهمنا الكل انت موكش كاتبه باسمك

و حتى كان تحب تدافع عليه و هذاحقك دافع عليه من غير ما تسب أو تهين الي انتقده و إلا تعتبرها اهانة شخصية

و الرد يكون بالمنطق و الحجة و الدليل موش تقول هذا كذب و افتراء و تسب و تلعن

لو كان عندك حجة راك نشرت تعليقي

عندك الي حكيت فيه على علاقة محمد بنساه، و كيفاش طلق المرا الثانية بعد خديجة كيف كبرت وهو خذا عيشة، طفلة في عمر بنت بنته،و ما رجعها كان ما تنازلت على ليلتها لعائشة شفت الذل ؟ هذا عدل متاع نبي و إلا أنا نكذب عليه ؟ ياخي مات و عنده تسعة نساء ولا لا؟

خذا صفية بنت حيي ليلة موت بوها و أهلها الكل في مجزرة و إلا نزيد عليه؟

خذا بنت ولده بعد ما شافها عريانة و اشتهاها و هبط الوحي حل له مشكلته الجنسية ولا هاذي اسرايليات

رد بالك راهي مصادري قرآن و صحيح

البخاري و صحح مسلم


رد عليه إن استطعت

:)

انتوما الخوانجية تفكروا بالمقلوب في عوض تدرس الحاجة و تحللها لين توصل لنتيجة ، لا ، تحطوا النتيجة قبل، محمد رسول الله و أحسن واحد في الدنيا و ما يغلطش ، و الباقي الكل ، عمايلوا الكل يا تغطيو عين الشمس بالغربال يا تهربوا يا تدوروها إرهاب،

قال شنوه يهين فيا أنا

تي شكون جبدك يا صالح؟

تعرف العنف متاعكم السبب فيه أنكم عندكم عجز هجومي ودفاعي

تفوريخ الأحزاب و السبان والحملات الي باش تعملوها شيئ يضحك

تعرفش علاش


لأنكم أصلا ما تعرفوش حقيقة دينكم

التناقض الي فيه عامل لكم بلبزة في مخاخكم


وحدة فرحانة الي هي عورة و شطر عبد و ملك راجلها

الآخر قال ما دام الإسلام قال أربعة يوفى الحديث هاذاكا الصحيح


شمن نقاش مع ناس تتكلم باسم ربي و هي لا تعرف ربي لا قارية كلامه


كوبي كولي و سبان و تفويخ و عد

3amrouch a dit…

اش قولك سير ماني في هاالتعليق
هاني بديت نحكي معاك
جاء مسطها
اسف اما نفضل ننسحب لكي لا يطيح المستوى ونرجعو للسبان
عاشور
انا مانمشيش عند لمصاروة ناخو في افكار ونجي نعيط انا مستمد افكاري من حديثي صلى الله عليه وسلم" استفتو انفسكم" يعني مستواي وقرايتي وتجربتي تسمحلي باش نفرق وحدي بين مايجوز اولا يجوز
والقص وللزق موش جوي خاصة بدون ذكر المصدر
وكيما قال قاليلي نقلك حتى انا ومع ذلك فهو رسول الله احب من احب وكره من كره
وبالنسبة للاخت الفاضلة متاع البارح قالت ههككه للاستفزازك ،نعرفها معرفة شخصية ونجم نقلك انها متهنية مع راجلها الي يحبها ويقدرها وهي تبادلو بالمثل

عاشور الناجي a dit…

لا ما تهربش ،


هاني نشرت تدوينة عندي ونخليك هنا تناقش مع ماني وحدكم،

أنا زعمة فرحت كيف ما لقيتش اسمي في الجماعة الي تكرههم
:)))

و انتسك برسولك

عاشور الناجي a dit…

و قال الآخر لو كنت أعلم أنك رسول الله لما حاربتك
;)

3amrouch a dit…

ماني قتلك راك ماجيت شي
تي هو الكره عاطفة دونك فما احساس
اما انتي لا هذا ولا ذاك
حتى كرهي امنية ليك مانفرحكش بيها

3amrouch a dit…

حسب معلوماتي المتواضعة نعرف انو سقراط رفض الامتثال للالهة متاعهم و
رفض وجودها وهذاكه علاش قتلوه
بالنسبة لحكاية السبان وضحت موقفي وقتلك ماعندهاش علاقة بالدين ولكن الاحترام يتفرض من تصرفات الاشخاص ولا يعطى ،على كل شخصيا ماسبيت حد ومانسب حد خاصة من وراء شاشة حاسوب ،بالنسبة لسائر الخلق فمعظم اصحابي من الغربين ولااتحرج من مرافقتهم و صحبتهم وذلك لانهم لم يمسو معتقداتي بحرف ،في بعض الاحيان وعند العشاء في مطعم يمتنعون عن طلب بعض المشروبات احتراما لي ،تصرفات كهذه لا تملك الا ان تنحي امامها اكبار وزيد شخصيا احاول دوما ان افعل مااقول واحافظ على معتقداتي رغم المغريات وهوما يروا بالجميل للانسان السوي في مخو ويضهرلي انت مخالطهم وتعرف.
انا الفكر الي ندافع عليه هو لك دينك ولي ديني،لاتاذيني ولا ناذيك، كل واحد حر، اما تجي تسبلي قدوتي،نحكي في المطلق راهو موش عليك، وتقلي راو بيه وعليه والخ من الافتراء وتطلب مني باش نسكت بحجة حرية التعبير نكذب عليك كان نقلك حاضر....تي انت يجيك جارك يقلك ولدك موش متربي ولاخوك بيه وعليه تفد وتشريهالو موش هكه كيفاش تحبني نقلبل النقد في من اعتبره خير الناس؟
الناس الوحيدين الي سبيتهم ونسبهم ونبغضهم في الله هوما الي على شاكلة عماد وهاك المصري متاع حجاب ونقا ب و وكريشان وغيرهم كثير هذوكه نستعرف بكرهي ليهم
بالنسبة لتضخم الانا متاعك فكان مجرد تساول وانت زادة متعرفنيش وربما نلتقي يوما ونزيدو نحكيو اكثر
بالنسبة لنعتك ليا بالجهل نعرف انا نتحدث في المطلق وفي العموم مانيش مع التشخيص والتعرض للاشخاص ،يبقى ديما مرتبط بالاحترام المتبادل.
شخصيا ماقريتش لفرويد وماعنديش عليه اطلاع،تونحاول دوب مانلقى وقت ونرجعلك،
كان لي اصدقاء يدرسون مادة الفلسفة وهذاكه علاش عند بعض المعلومات السطحية كسبينوزا وكانط وافلاطون لكن بدون تعمق كنت نتذكر ديما يبربشني احدهم ويقلي انت شكون؟ نقلك نتصور روحي انسان هههه يقلي نعلمك انو انت حسب سقراط تعتبر حيوان عاقل؟؟؟؟؟عاد نجاوبو ونقلو انا البس النظارات وهذا ماهوش فعل ولا صفة من صفات الحيوان يسكت مسكين ومايلقى مايقول هههه
ماعنديش احتكاك كبير بعالم التدوين الي نعتبرو تجربة شخصية ثرية ،تعلمت برشة حاجات،عرفت برشة عاد باهين يمكن ماكنتش نعرفهم في ظروف اخرى وزيد صحيح نوافقك الراي انو هوا مجتمع مصغر فيه كافة الاطياف باللحاس للقفاف للحزبيست للقومي للعلماني هههه للي يخاف ربي ههههه للبزناس هههه
وسيدنا ربي واحنا عبادو
عاشور
شكرا لانك فطنتني الي انا عملت خطا في زيادة اسم شخص ماعندو ماعملي هاني نحيتو و
بدلت لازم فرويد اثر عليا ههههه

عاشور الناجي a dit…

ماني قلت لك راكم ما تنجموا كان تكرهوا و تسبوا


توه سبيتكش أنا ؟

و مع ذلك موش باش نرد عليك ونسبك

أخلاقك سببها خوف من الله و طمع فيه


انتهازية


أخلاقي أنا احترام لروحي و للإنسان و قناعة شخصية

و هنا يكمن الفرق كله

Mani l'Africain a dit…

يا عمروش يهديك ، هانا قاعدين نحكيو ما تكرزش عاد . وإذا كان ما عجبكش كلام عاشور احسب روحك ما قريتوش .

على فكرة آنا ما نعرفوش عاشور وعندي ملاحظات على المنهج الإستفزازي متاعو . باهي عمروش وسع بالك معاي بالكشي نوصلو لحاجة بحديثنا هاذا . باش نلخصلك حاجات قالهم عاشور ما فيهمش سبان آما فيهم حقايق تاريخية . إنتي تقول اللي الرسول قدوتك وعندك ألف حق . وحتى آنا نجم نقول اللي الإسكندر المقدوني هو قدوتي وماتنجمش تقلي ما عندكش الحق . حتى لهنا متفاهمين ولا لا ؟

باهي تجي تقلي الإسكندر المقدوني حرق المكتبة متع بابل وخسرت البشرية في جرتو ثروة معرفية هايلة ، نجمشي آنا نجي نكذبك ؟ يستحيل ! عخاطر هاذي حاجة ثابتة تاريخيا وموثقة ومايناقشها حد .

باهي ياسر . إيجا نشوفو الحقايق التاريخية اللي في التعليق متع عاشور الناجي (اخترت هاذوما باش ما نزيدش نميع الحوار ونجبد على حاجات أخرين) . بالله صلحلي كاني غالط يا عمروش يا خويا :

ـ محمد خذا عايشة وعمرها على الأكثر 9 سنين (صح أم خطأ ؟)
ـ محمد حب يطلق وحدة من نساه عخاطرها كبرت في العمر (صح أم خطأ ؟)
ـ محمد مات وعندو 9 نسا (صح أم خطأ ؟)
ـ محمد تزوج بصفية بنت حيي ودخل بيها نهارة اللي قتل بوها وخوها وزوجها وقبيلتها الكل (صح أم خطأ ؟)
ـ محمد اشتهى مرط ولدو بالتبني زيد (صح أم خطأ ؟)
ـ القرآن سمح لمحمد باش ياخو مرط زيد بعد ما طلقها (صح أم خطأ ؟)

سبيتشي حد كيف قلت هاذا كلو والا لا ؟ عيش عمروش الباهي افهمني ، هاذي حقايق ما نجمش آنا نطّلع عليها ومن بعد نقول ما صار شي السيد هاذا مازال قدوتي . صحيح هاذي الكل عندها مبررات وتفاسير في كتب السيرة آما علاش تحبني ناخو تفسير موش آخر ؟ وعلاش ما نستفتيش روحي في عوض ما نستفتي الناس لخرين ؟

كيف تقرا سيرة الإسكندر تو تلقا زادة ناس تبرر الجرايم اللي ارتكبها والمجازر وحرق المكتبات إلخ . في نهاية الأمر هو قايد عظيم ساهم في الحضارة الإنسانية بقدر ينجم ينسينا في اللي عملو في الشعوب المحتلة . آما نتفهم الناس اللي تقول اللي الإسكندر عمل برشة حاجات لا أخلاقية واللي يقول "الإسكندر المقدوني ما هواش قدوتي" عندو ألف حق .

ما نعرش كانك قاعد تفهم في يا عمروش والا كرزت كي كتبت ها الزوز حقايق التاريخية على نبي الإسلام . آنا اللي طالبو منك هو أنك تعطيني حرية الإختيار وقتلي نقرا حاجات كيف هكة صحيحة وموثقة في كتب السيرة والحديث . موش مهم نمن بمحمد والا ما نمنش ، آما مهم ياسر في نظري الشخصي كونو حقايق كيف هكة يكونو الناس الكل يعرفوها . المشكل هو كونو أي واحد يحكي ع حاجات كيف هكة يقولولو يا بيوع يا كافر يا ناقم يا جاحد ... يا سيدي آنا باش نحتفظ بتأويلاتي لنفسي ، آما خلي الناس تعرف الحقيقة التاريخية واللي يحب يمن يمن على قاعدة موش بالصياح والعياط والتنرفيز وهو ما عارف مالدين شي .

نشالله ما يكونش كلامي في النافخات زمرا .

3amrouch a dit…

لا ماكرزت هاني نتبع فيك

3amrouch a dit…

عاد كارك استشهدت بالحجاج متاعنا منو فينا الي هدم الكعبة ورغم ذلك عمل فتوحات كبار

3amrouch a dit…

ماني
عاد انا في بالي بيك قدوتك هو ماني الي حكينا عليه باهي ماعليناش.
بالنسبة للامثلة الي جبدت عليهم انا متاكد انك تعرف احاديث العلماء فيهم اكثرمني وقريت اجاباتهم وردهم ولذا مانيش باش نعمل قص ولصق ونجاوبك
باش نستفتي روحي كيما سبق وقتلك
هاك وحدك قلتها عندها تفاسير متاعها وماجيتش انا قتلك امن بالسيف ولا تبع دين محمد و اترك دينك
انا شخصيا كيفاش نلخصها الحكاية
انا نتفادى الوقوع في قول الله تعالى"تؤمنون ببعض وتكفرون ببعض"
وزيد فما اية تقلي "ما آتاكم الرسول فخذوه وما نهاكم عنه فانتهوا"
وسع بالك معايا شوية بركة هاني قريب نكمل
فما اية اخرى تقول :
"قل سبحان ربي هل كنت إلا بشر رسولا"
يعني البشر تسبق الرسالة وماهو الا بشر مثي مثلك ولكن الله اصطفاه وطهره.
اش يحب يقول لكلام هذا الكل
يحب يقل الي هذه سبيلي ادعو على بصيرة انا ومن اتبعني
كيف نقرا ربي قال فما سبع سموات؟ نوقفش حياتي انا ونقعد نحسب فيهم قداش من وحدة ،بلكش تطلعش وحدة ناقصة؟؟؟
ماو ربي قال سبعة يعني سبعة يوفى لحديث.
علاش نكسر مخي ونقعد نخمم
مازلت تبع فيا ولا فديت؟
تي هو العلم الحديث اثبت انو الانسان يستعمل عشر مخو فقط...يعني بالتفتوفة هذيكة عمل طيارات وصواريخ وهواتف،تتخيل في مخك كان نوصلو لخمسين في المئة من مخنا اش انجمو نعملو؟؟؟ باش تقولي شنية العلاقة؟ باش نقلك راهو القرأن صالح لكل عصر واوان نعرفك ماتحبهاش عاد هذي بالكش الي باش يجيو بعدنا بقرن مثلا يكتشفو حاجات اخرى صعيبة علينا تو، هذاك علاش نقرى الاية الي يقول فيها اللله تعالى"فكشفنا عنك غطاءك فبصرك اليوم حديد" يعني فما امور ناخوها مسلمات ونحطها تحت بند لحكمة لايعلمها الا الله,هذ مايمنعش اني نقرأ ونبحث ونحاول نطور نفسي،اما حكاية محمد سحر ومحمد اوشك على الانتحار ومحمد خذا كتابو من ورقة فكلها امور لن تزيدني لا كفر ولا ايمان
عودة بعد الفاصل