lundi 2 juin 2008

ياللي تحلم بالمغرب الكبير ، أرجع غدوة



نعتذر أولا للصديق بيغ تراب بوي عخاطر التيتر يمكن يظهر موجه ضد شخصو ، آما حبيت نقول كليمتين فيما يخص نهار التدوين للمغرب العربي الكبير . وفي هالإطار وبما أننا نحكيو على بيغ ، برشة ما يعرفوش اللي "بيغ" في المغرب اسم مغني متاع راب يرابي باللهجة المغربية ويستعمل برشة كلام زايد هذاكة علاش يسميو فيه زادة "الخاسر" ، يعني القبيح .

ما نعرفش قداش يلزمنا نستناو من عام باش يظهر في تونس مغني كيما بيغ هذا . وبقطع النظر علمستوى الفني متع اللي يقدم فيه بيغ ، وبقطع النظر زادة عالكلام الزايد وهل أنو من المقبول أنو كونو نحطوه في الغنا والا لا ، اللي يظهر مالفينومان متع بيغ هو كونو مساحة الحرية في المغرب أوسع ببرشة من نظيرتها في تونس . وهذا كلام يوجع ، عخاطرنا في تونس نتبجحو ديما بتفوقنا على البلدان الشقيقة اللي نتقاسمو معاها الميزيريا وماشي في بالنا اللي أحنا خير مالناس لخرين . آما الحقيقة هو كونو المغرب فاتنا ببرشة محطات ، وفي في برشة مجالات زادة ، السياحة خاصة (وهاذي اللي ظاهرة للعيان والناس الكل تحكي عليها ، آما ما خفي كان أعظم) . في مجال الصحافة يكفي وأنك تقرا مرة والا زوز جريدة المساء (اللي تصدر كل صباح !!!!) باش تقتنع اللي الإخوة في المغرب فاتونا ياسر في هالمجال هذا ، وتنجم تزيد تطلع على مجلتي "نيشان" و"تال كال" وما يكتبو أحمد رضا بنشمسي فيهم باش تفهم اللي صحافتنا تحتضر .

الحقيقة آنا ما نحبش ياسر المقارنات لكن اليوم كي نحكيو عالمغرب الكبير يلزمنا نعرفو الساعة شكونهم جيراننا اللي نحبو نتحدو معاهم . نتفكر اللي قبل البارابول والنتايج الكارثية متاعو كنا في التسعينات نتفرجو في القناة الجزايرية اللي تتجبد بالأنتان العادي . في نشرة الأخبار متع ماضي ساعة ، كانوا الصحافيين يحكيو بحرية على المشاكل اللي يواجهوها المواطنين . صحيح اللي الإرهاب كان هو مشكلة الجزاير لولى ، وصحيح اللي حد ما يتعرض في الإعلام الرسمي للجيش وسيطرتو الخفية على الإقتصاد والسياسة ، آما الدزيرية عالأقل في الوقت هاذاكة كانوا يقولو قدام التلفزة وبكل حرية الليالبلدية ماهياش قايمة بدورها والا اللي مدير السبيطار الفلاني ما قامش بشراء التجهيزات اللازمة والا اللي المسؤول العلاني ما يسمعش شكاوي المواطنين . يكفي وأنك تتابع الحملة الإنتخابية عالتلفزة الجزايرية باش تفهم آش معناها تعددية رغم اللي المسار الديمقراطي في هالبلاد ما زالتلو أشواط كبيييييييييييييرة قدامو باش ياقف على رجليه .

"احمدو ربي ماكمش في دزاير" كيما قال لاخر في مسرحية "هنا تونس" ، آما كي نسمع اللي فمة توانسة هربوا لدزاير ، نقول زعمة آش صار ؟ وقتلي ما نعرش قداش من صحيفة "مستقلة" ما تنجمش تجبد على أحداث أليمة صارت في ولاية قفصة ، نقول يا خيبة المسعى . وقتلي صحافتنا الحرة والنزيهة والمحايدة ما تجبدش على عملية سرقة عالمية متورطين فيها توانسة ، نقول دزاير برجولية خير .

آش قعد ؟ موريطانيا ؟ ماكم تعرفو آش صار عاد في موريطانيا اللي عيينا نتمقعرو عليهم ! نتفكر واحد تونسي مشا لنواق الشط قعد يحكيلي عالوسخ والفقر والتخلف ، زعمة أحنا في تونس عايشين في نعيم ؟ تي أحنا التوانسة شرينا الخطوط الموريطانية ! يجيوا توة يعطيونا دروس في الديمقراطية ؟؟ لا لا موش صحيح ، يكذبو . مافماش ديمقراطية في موريطانيا . الديمقراطية ما تتماشاش مع الفقر . حرية التعبير ماهياش كومباتيبل مع الأمية . هذاكة الكلو تمثيل . الديمقراطية بالحق ما تلقاها كان في تونس .

هانا طلعنا الرابعين في الترتيب ، ورانا جماهيرية الرمال العظمى اللي نتنافسو معاها على تفادي النزول . آما مايسالش ، أحنا ببركة سيدي ساركوزي نوليو قوييييين قويييين قوييييين ، وماو باش نوليو عاصمة المتوسط عاد . إتحاد مغرب شنوة ؟؟ لا يا ولدي ، الدنيا مع الواقف ، الإتحاد المتوسطي وما أدراك . هايكة حربوشة نصبرو بيها حتى لنهار مالنهارات تقوم قايمة لها الإتحاد متع دول المغرب الكبير . آما ننصحكم حاجة ، يزينا ما حلمنا ، هات الصحيح . 20 سنة من قمة مراكش آش عملنا فيهم ؟ حتشي . مالا علاش الحديث الزايد ؟ باش نعملوها كيما علكة الوطن العربي الواحد اللي شدينا فيها خمسين سنا ولتوة ما ناش مسيبين ؟

صحيح إتحاد المغرب (اللي ماهواش عربي ، آما هاذي قضية أخرى) حاجة هايلة وقوية وفازة طيارة ياسر ، آما كيفاش تحب تعملو هالإتحاد وقتلي المصاير متع الشعوب شادتها كمشة كل واحد فيهم يلوج على مصلحتو ؟ كيفاش تتحد وزوز دول مسكرين الباب على بعضهم وحد ما يحكي مع حد ؟ كيفاش تتحد وواحد مالبلدان الخمسة عندو مشكل انفصالي خطير برشة والشكشوكة الكل داخل فيها جارو المغاربي اللي يدعم في الإنفصاليين ؟ كيفاش تتحد وعندك رؤساء وزعماء يتنافسو في شكون يبقى في الكرسي أكثر ؟ كيفاش تتحد مع واحد قالك افريقيا هي الكل ، وواحد آخر يستنى في بركة سيدي سركوزي ؟

نفس المشاكل اللي منعت العالم العربي يتحد من هاك العام ، زعمة موش وقيت باش نفيقو ونقولو هات نعملو البنية التحتية متع الإتحاد قبل ما نحكيو عالإتحاد في حد ذاتو . والبنية التحتية ماهياش قمم متع رؤساء وملوك يبوسو في بعضهم قدام الكاميرا . البنية التحتية هي المشاركة الشعبية في الحياة العامة في كل بلاد ، تحرير الفرد بعد ما تحررت الشعوب ، تحرير الصحافة والإعلام وضمان الممارسة الديمقراطية الصحيحة على أسس وقواعد . البنية التحتية هي فضان النزاعات متع الحدود وتحرير التجارة . وفي هاذي نجمو ما نحكيوش على مغرب عربي ولاهم يحزنون ، عخاطرك كي تحرر التجارة مع جارك تكون خذيت قرار اقتصادي موش ايديولوجي . ما يهمش لو كان جا جارك مسيحي والا يحكي بالروسي المهم كونو العلاقة تكون مبنية على مصلحة مشتركة ، موش على أحلام يتضح بمرور الزمن أنها كانت أوهام .

اللي خايف منو في حكاية الإتحاد المغاربي هاذي ، هو كوننا (كيما في كل مرة) هازتنا العواطف الجياشة والكلمات الرنانة وننساو الواقع في حين أننا لازم نقصو من الإيديولوجيا والأحلام والشعارات ونكونو براغماتيين . وهذا ما يمنعش اللي في نهاية المطاف آنا من أجل إتحاد شعوب المغرب الكبيروتو نرجع معاكم غدوة وبعد غدوة وبعدو كان لزم .

هذا رايي قلتو

3 commentaires:

Big Trap Boy a dit…

أوافقك الرأي تماما بما أنّي أنا أيضا مع المقاربة البراغماتية للإندماج المغاربي ولا الإيديولوجية

Big Trap Boy a dit…

لكن هذا ما يمنعش أننا نطمحوا لمستقبل أفضل

Bel Malwene a dit…

trés bon post Mani !! ya3tik essa7a !!
mais ça ne ni pa l'autre, Blogger pour le Maghreb peu être une incitation a construire d'abord "l'infrastructure du Maghreb" que tu viens de décrire ... ce que tu a présenté c'est de trés bonnes suggestions justement pour le Maghreb ... el 7olm bahi ya Mani ... khali ne7lmou b nhar nwaliw fih 9wiiinn :)
w kima y9oulou : " khali el farkh yjana7 ... khali el farkh ytir ..."