samedi 19 décembre 2009

الحاج حميدة وحكايتو مع الجريدة

الحاج حميدة يدخل لقهوة الإستقلال في يدو جريدة. سي علالة يعيطلو

سي علالة : الحاج حميدة ! يا مرحبا يا مرحبا ! أيا إيجا اقعد اشرب قهوة.
الحاج حميدة (بصوت يتسمع بالسيف) : صباح الخير الناس الكل.
سي علالة : منصف، أيا عيش ولدي جيب قهوة للحاج. (يتلفت للحاج حميدة) حاج ماو لاباس ياخي آش بيك اليوم ؟
الحاج حميدة (يتمتم) : شي... حتى شي...
سي علالة : تي لا عاد فمة حاجة...
الحاج حميدة (يتنهد) : عيب والله عيب.
سي علالة : شنوة هو اللي عيب يا حاج ؟
الحاج حميدة : عيب اللي يحكيو فيه على هاك المرا. ما يجيش، مايطلعش علينا...
سي علالة : شكونهم هوما ؟ وشكوني هالمرا ؟

(منصف يجي ويحط قهوة قدام الحاج)

الحاج حميدة : تو حديث هاذا يقولوه على بنات الناس ؟ تي حتى لو كان عملت حاجة، ماو استر ما ستر ربي. ياخي أحنا عندنا الشي هاذا ؟ نحكيو على النسا كيما هكة ؟ يا رسول الله سبان في الجرايد... تهتيك أعراض... لواه ؟ فمة شكون يرضاها في مرطو والا في بنتو ؟ تي كلنا توانسة راو ! كلنا ! والسبان هكة ماقالش بيه ربي والنبي. تي زعمة عملو عملة كي سبوها هكة... مانيش فاهم ومانيش باش نفهم... الشي صعب على مخي... والناس هاذم مانعرفهمش... مانيش منهم... مايشرفونيش...
سي علالة : لتوة لا قتلي شكونهم هوما وشكوني هالمرا اللي تحكي عليها ؟

(هوما هكاكة ودخل واحد للقهوة)

اللي دخل : حاج حميدة... سامحني آما راو جماعة الشعبة يستناو فيك باش يبداو...
الحاج حميدة : سامحني سي علالة يلزمني نمشي... تو نحكيلك مرة أخرى.

1 commentaire:

Amelie Poulain a dit…

subtile! trés subtile ...