samedi 26 décembre 2009

الترجي... دولة

نحب نوضح اللي آنا حاليا عندي سنين الله ماعادش نتفرج في الكورة. الكورة والناس متع الكورة والأحاديث متع الكورة ماعادش يهموني. ولكن ورغم هاذاكة مازالت عندي ذكريات باهية مالفترة الكروية في حياتي.

كبرت مع الترجي. في عايلتي مانعرف حد يحب حاجة أخرى غير الترجي. في حومتنا فمة وحيد والا زوز منعوتين بالصبع، عخاطر يشجعو في الأمل الرياضي بالعزڨة، آما البقية الكل... الناس الكل... تموت وتفنى عالترجي...

ذكرياتي الكروية الكل مربوطة بالترجي. وماللي بديت نعقل عالدنيا ما نعرف حتى فريق يهز البطولة إلا الترجي. من موسم لموسم، الأمور كانت واضحة ومحسومة، الترجي باش تهز البطولة، والبقية يلعبو عالطياح. الحكاية مافيهاش لعب، بالصلاة بالتكربيس الترجي ديما رابح رابح. تي هو الحكم مع الترجي، وكي تدور البلاد ماتلقاش حكم مايحايلش مع الترجي. والشي هاذا ماكانش يقلق حد، عخاطر الناس الكل تحب الترجي... إلا بطبيعة الحال الزويز متاع الأمل الرياضي بالعزڨة. آما الناس الكل كانت مطفيتهم، حد مايتلفتلهم. وكي يربح الترجي وهوما يبداو يعيطو اللي الحكم يحايل مايسمعهم حد. يكفي باش يتلفتلهم واحد ويقوللهم "طفيوا رواحكم" باش يسكتوا. دايور آنا عمري مافهمت وعمرها مادخلت لمخي كيفاش واحد ينجم مايشجعش الترجي. تي هو الترجي رابح رابح، مالا لواه ؟ فين ماشي غادي تشجع في أندية نكرة ماعندهاش الشطر متع الربع متع الحديقة ب ؟ غريبة...

في مخي الترجي كان ويبقى ديما دولة. إينعم الترجي دولة. دولة عندها مؤسسات ورجال ومسؤولين ووزرة... تي حتى المنتخب كي يلعب كانت ملاعبيتو الكل مالترجي. وكي نغنيو في الغرادان، نغنيو غنايات الترجي وهو راهو المنتخب يلعب ! واحد مالناس آنا في الوقت هاذاكة مانيش فاهم علاش فمة منتخب أصلا ! تي هو الترجي دولة، هز الترجي يلعب بمريول الترجي وفك علينا !!

آما تو مدة ماعادش نتبع في الكورة... كل شي عندي مساط... ماعادش فاهم حتى شي، والكورة هاذي ماعادش كورة. فمة عام مافهمتش آش صار فيه. بالنسبة لي آنا العالم انتهى النهار هاذاكة. ماكنتش نتصور يجي نهار والترجي مايهزش البطولة. كانت حاجة فوق الخيال. نكتة. حاجة ماتتصدقش وزيد زيادة حد مايهب يحكي في حكايات ماسطة كيما هكة. للي جا نهار والترجي خسرت. ومنبعد ماهزتش البطولة. ومن بعد مشا رئيس الجمعية، ومشاو الملاعبية الباهين، والكورة ولات غير الكورة. كل شي ولا متبدل علي. البطولة كل عام يهزها واحد. مامسطها الدنيا. ومامسطها الكورة وقتلي الترجي ماتربحش. ومامسطها وقتلي الملاعبية يبداو مفرقين بين الجمعيات ووقتلي الأمل الرياضي بالعزڨة تولي عندو ملاعبية في المنتخب.

5 commentaires:

Unperfectchild a dit…

j'adore

البرباش a dit…

تي هاك طلعت ولد جمعية

ثالث مدوّن على حد علمي بعدي أنا و الدوعاجي م اللي جاهروا بحبهم للترجي

أيا ش قولك نسمّيوا أرواحنا المدونون المكشخون... و يولي كل مين يدخل لمدوناتنا يسمع غصبا عنّو غناية من غنايات المكشخة

هههههه

Big Trap Boy a dit…

ترجّي دولة قالوها ناس بكري ههههه

تدوينة حلوّة

Mani l'Africain a dit…

يا برباش، فمة غنايات تحسابهم غنايات على الترجي، وهوما غنايات عالمنتخب !!!

الحلزون a dit…

من فضلكم عندي سؤال : ما مدى صحة مقولة "الترجي رشوة" ؟